قطعات درشان حضور تاج الشریعہ علیہ الرحمہ ، محبوب گوہر اسلام پوری

حضور تاج الشریعہ علیہ الرحمہ 

کے وصال پر ملال کے بعد لکھے گئے

 مولانا محبوب گوہر کے( ۲۵ )نایاب قطعات 

از ۔۔۔   محبوب گوہر اسلام پوری 

کوئی رہ کر تو کوئی غائبانہ ناز کرتا ہے

ہے جو بھی اعلی حضرت کا دوانہ ناز کرتا ہے

منافق! اس طرح تیرے حسد کرنے سے کیا ہوگا

مرے تاج الشریعہ پر زمانہ ناز کرتا ہے

۔۔۔۔۔۔۔۔۔۔۔۔۔۔

کیا ملے گا غوث الاعظم کے قلندر کا جواب

دور حاضر میں نہیں ہے میرے اختر کا جواب

جامعہ ازہر کے یوں تو اور فارغ ہیں مگر

ہے اگر تو ڈھونڈ لاو فخر ازہر کا جواب 

۔۔۔۔۔۔۔۔۔۔۔۔۔۔۔

بریلی میں شہ بغداد کے پیارے بھی رہتے ہیں 

کرم کی جھیل میں رحمت کے فوارے بھی رہتے ہیں 

یہ ثابت ہوگیا تاج الشریعہ کے جنازے میں 

جہاں پر چاند رہتا ہے وہیں تارے بھی رہتے ہیں 

۔۔۔۔۔۔۔۔۔۔۔۔۔۔۔

دعا کے پھول فرشتے لئے ہوئے اترے

وہ جانے والا بھی اپنی لحد میں خوب گیا

تھی جس کے دم سے عقیدت کی چاندنی گوہر 

وہ جگمگاتا بریلی کا چاند ڈوب گیا

۔۔۔۔۔۔۔۔۔۔۔۔۔۔۔۔۔۔۔

میرے دل کی مکڑیوں نے اپنا جالا بن لیا

نام نامی جس گھڑی اختررضا کا سن لیا

ساری دنیا جانتی ہے غسل کعبہ کے لئے 

میرے مولی نے مرے اختررضا کو چن لیا 

۔۔۔۔۔۔۔۔۔۔۔۔۔۔۔۔۔۔

اک شہر میں سو لاکھ کا مجمع نہ ملے گا

ممکن ہے کہ اب ایسا جنازہ نہ ملے گا

پیران طریقت کی کمی کا نہیں شکوہ 

دنیا کو مگر تاج الشریعہ نہ ملے گا

۔۔۔۔۔۔۔۔۔۔۔۔۔۔۔۔۔۔۔۔

رضا والا ہے کاشانہ مرے تاج الشریعہ کا 

چھلک اٹھا ہے پیمانہ مرے تاج الشریعہ کا 

پڑے گا وقت تومذہب کی خاطر جان دے دیگا

ہے ایسا ایسا دیوانہ مرے تاج الشریعہ کا 

۔۔۔۔۔۔۔۔۔۔۔۔۔۔۔۔۔۔

بڑے سکون سے اپنی لحد میں سوتا ہے

جو ان کی زلف دوتا کا اسیر ہوتا ہے

قسم سے ناز کرے جس پہ جامعہ ازہر 

وہ کوئی اور نہیں ہے رضا کا پوتا ہے

۔۔۔۔۔۔۔۔۔۔۔۔۔۔۔۔۔۔۔

کہتی ہے یہ سنی جماعت اچھے سے بھی اچھے ہیں 

ہم لوگوں کے اعلی حضرت اچھے سے بھی اچھے ہیں 

اس بھارت میں پیر طریقت اور بھی اچھے ہیں لیکن

فخر ازہر، تاج شریعت اچھے سے بھی اچھے ہیں 

۔۔۔۔۔۔۔۔۔۔۔۔۔۔۔۔۔

اجل کے بعد دیار حبیب میں رکھنا

نصیب والا ہوں میں، خوش نصیب میں رکھنا

حضور تاج الشریعہ کی یہ وصیت تھی

کہ بعد موت، ولی کے قریب میں رکھنا

۔۔۔۔۔۔۔۔۔۔۔۔۔۔۔۔۔۔

تھی گہری نیند میں ہم، وہ ہمیں جگا کے گئے

سبق جو ان کو رضا سے ملا، پڑھا کے گئے

رخ نبی کی زیارت کا شوق تھا کتنا 

حضور تاج الشریعہ وضو بنا کے گئے

۔۔۔۔۔۔۔۔۔۔۔۔۔۔۔۔۔۔

سبھی خاموش ہوجائیں تو تنہا بول دیتا ہے

جو حق ہے وہ رضا کاخانوادہ  بول دیتا ہے

کسی کو کچھ بتانے کی ضرورت کیا ہے اے گوہر

ہے کیسی شخصیت یہ تو جنازہ بول دیتا ہے

۔۔۔۔۔۔۔۔۔۔۔۔۔۔۔۔۔۔۔۔۔

دیدار کرنے سارا علاقہ نکل گیا

جس سمت میرا تاج الشریعہ نکل گیا 

سرکار ازہری کے جنازے کو دیکھ کر

کتنے مخالفوں کا جنازہ نکل گیا

۔۔۔۔۔۔۔۔۔۔۔۔۔۔۔۔۔۔۔

مرے اختررضا کو مفتئ اعظم نے اک اک پل

کبھی تنظیم میں رکھا کبھی تحریک میں رکھا

وہ دل سے چاہتے تھے حضرت تاج الشریعہ کو

اسی خاطر قضا کے بعد بھی نزدیک میں رکھا 

۔۔۔۔۔۔۔۔۔۔۔۔۔۔۔۔۔۔

بارش رحمت میں تھے وہ بارش رحمت میں ہیں

فضل ہے رب العلی کا، چین سے تربت میں ہیں 

ڈھونڈنے والی نگاہوں کو خبر کردیجئے

۲۰ جولائی سے ہی اختررضا جنت میں ہیں 

۔۔۔۔۔۔۔۔۔۔۔۔۔۔۔۔۔۔۔۔

رضا کے لال کی تعریف ہوتی ہے تو ہونے دو

ہیں اس کے مستحق، توصیف ہوتی ہے تو ہونے دو

نہ چھوڑو بستی بستی قریہ قریہ، یہ حسیں نعرہ

کسی کے پیٹ میں تکلیف ہوتی ہے تو ہونے دو 

۔۔۔۔۔۔۔۔۔۔۔۔۔۔۔۔۔۔

ہمارے جانشیں"اختر میاں" ہیں اے جہاں والو!

ہوئے دنیا سے یہ کہ کے  روانہ مفتئ اعظم 

گھرانہ کتنا اچھا ہے مرے تاج الشریعہ کا 

ہیں دادا حجتہ الاسلام، نانا مفتئ اعظم 

۔۔۔۔۔۔۔۔۔۔۔۔۔۔۔۔

تقوی ہو تو ایسا ہو، فتوی ہو تو ایسا ہو

آنکھوں میں سما جائے چہرہ ہوتو ایسا ہو 

اک مفتئ اعظم ہیں، اک تاج الشریعہ ہیں 

ناتی ہو تو ایسا ہو نانا ہو تو ایسا ہو 

۔۔۔۔۔۔۔۔۔۔۔۔۔۔۔۔۔۔۔

ضرور اس کی انانیت کا دھاگا کٹ گیا ہوگا

اگر اونچا رہا ہوگا تو قد بھی گھٹ گیا ہوگا

جنازہ دیکھتے ہی حضرت تاج الشریعہ کا 

بریلی کے مخالف کا کلیجہ پھٹ گیا ہوگا 

۔۔۔۔۔۔۔۔۔۔۔۔۔۔۔۔۔۔۔

بہت سے اہل دانش اور اہل فن چلے آئے

سجانے خیر مقدم کا حسیں گلشن چلےآئے

مرے اختررضا جب پڑھ کے آئے جامع ازہر سے

تو لینے مفتئ اعظم انہیں جنکشن چلے آئے

۔۔۔۔۔۔۔۔۔۔۔۔۔۔۔۔۔۔

بہار خلد آنکھوں میں سموتا کیوں نہیں ہوگا

بڑے آرام سے مرقد میں سوتا کیوں نہیں ہوگا

ہوں پردادا رضا اور حجت الاسلام دادا ہوں

تو پھر تاج الشریعہ ان کا پوتا کیوں نہیں ہوگا

۔۔۔۔۔۔۔۔۔۔۔۔۔۔۔۔۔۔

میں پوچھتا ہوں زمانے سے، کون روکے گا 

بریلی شہر میں جانے سے کون روکے گا

نہ روک پایا جنازے میں ان کے، جانے سے

تو ان کی بزم سجانے سے کون روکے گا

۔۔۔۔۔۔۔۔۔۔۔۔۔۔۔۔۔۔۔

اس دور میں کوئی مجھے ایسا نہیں ملا

اتنا بڑا کسی کا جنازہ نہیں ملا

سب لوگ ڈھونڈ ڈھونڈ کے بھارت میں تھک گئے

لیکن جواب تاج الشریعہ نہیں ملا

۔۔۔۔۔۔۔۔۔۔۔۔۔۔۔۔

ہاں تاج الشریعہ ہے کوئی اور نہیں ہے 

پوتا وہ رضا کا ہے کوئی اور نہیں ہے 

اس دور میں ہیں، جس کے مریدین کروڑوں 

وہ ازہری دولہا ہے کوئی اور نہیں ہے  

۔۔۔۔۔۔۔۔۔۔۔۔۔۔۔۔۔

قسم خدا کی ہرا گلشن امید ہوا

اجالا میری نگاہوں میں وقت دید ہوا

اسے نہ جنتی بولوں تو اور کیا بولوں 

حضور تاج الشریعہ سے جو مرید ہوا

ختم شد